Sjálfsvíg og fréttamenn.

Íslenskir fréttamenn ættu að skammast sín fyrir að smjatta á fregnum af andláti fólks þegar talið er að viðkomandi hafi framið sjálfsvíg.

Andlát hins þekkta bandaríska leikara var á ósmekklegan hátt meðhöndlað af fréttamönnum á Íslandi sem einhver verslunarvara.  Íslenskir fréttamenn ættu að skammast sín fyrir aðkomu sína að umræddu máli.

Á það skal bent sérstaklega að fréttamenn mismuna látnum aðilum með fréttum sínum ef þeir sjá einhvern ávinning fyrir eigin hagsmuni af fréttinni. Því miður er það svo að margir taka sitt eigið líf þegar þeir eru orðnir þreyttir á lífinu og sjá ekki neinn tilgang með því að lengja líf sitt. Þetta er einkamál hvers og eins og kemur fréttamönnum ekkert við.

Fréttamenn ættu að sína þá lágmarks kurteisi að skýra frá láti hvers sem er ef farið er fram á það af aðstandendum hins látna, en ekki að geta á hvern hátt viðkomandi andaðist.  Ekki skiptir máli á hvern hátt einhver deyr.  Ekki er skýrt frá því að um sjálfsvíg hafi verið að ræða þegar menn aka svo ógætilega að þeir láta lífið og jafnvel fleiri.

Því miður er það svo að í sumum tilfellum er atburðarásin í alvarlegum ökuslysum á þann veg að draga má þá ályktun að viðkomandi hafi viljað deyja.  Menn sem fara einir í óbyggðaferðir þrátt fyrir viðvaranir og skila sér ekki til byggða er hægt að telja sem sjálfsvíg.

Fréttamenn ættu að sína hinum látnu þá virðingu að slepp úr fréttinni að um sjálfsvíg hafi verið að ræða því fréttamenn gera sér enga grein fyrir því hver ástæða slíkra aðgerða er. Eru jafnvel dæmi um að ósvífin mannréttindabrot af hálfu stjórnvalda hafi leitt til þess að viðkomandi sá ekki tilgang með lengra lífi.

Kristján S. Guðmundsson

Fv. skipstjóri