Hlýnun jarðar

Margir spekingar eru háværir um hlýnun jarðar af mannavöldum og er rammakvein þessara spekinga orðið leiðinlegt í ljósi þeirra upplýsinga sem finnast í frásögnum virtra vísindamanna.

Ef íslenska sjónvarpið er fyrir Íslendinga sem upplýsingamiðill er farið fram á það við stjórnendur þar að sýndur verður sjónvarpsþáttur sem bar nafnið Veðurfarsbreytingar á liðnum öldum (þulur Ómar Ragnarsson) og sýndur var í sjónvarpi árið 1998--2000.

Sjónvarpsþáttur þessi er mjög athyglisverður hvað varðar rannsóknir á veðri á jörðinni í mörg hundruð þúsund ár og þær sveiflur er orðið hafa í hitastigi samkvæmt mælingum á borkjarna úr Grænlandsjökli. Samkvæmt þessum borkjarnarannsóknum hefur hitastig á jörðinni sveiflast um meira en 10 gráður frá tíma til tíma án tilkomu mannsins.

Í þætti þessum er gerð grein fyrir stöðu rannsókna á breytingum á veðurfari á jörðinni og hugmyndir um hugsanlegar orsakir þeirra. Sveiflur þær sem orðið hafa á veðurfari á jörðinni á síðustu milljónum ára hafa ekki getað orðið vegna aðgerða mannsins og er því erfitt að sjá að maðurinn sé orðinn stjórnandi veðurs á jörðinni.

Sjónvarpsþáttur þessi er mjög athyglisverður með viðtölum við fjölda vísindamanna sem allir telja að fara þurfi varlega í allar fullyrðingar um áhrif mannsins og gjörðum hans á veðurfarið. Fram kemur í viðtölum við vísindamennina að miklar veðurfarssveiflur geta orðið á nokkrum áratugum og hafi orðið án aðstoðar mannsins í gegnum hundriðir þúsunda ára.

Það verður því að teljast hættulegt það rammakvein sem komið hefur frá sjálfskipuðum spekingum um að maðurinn sé orsakavaldur að hlýnun jarðar þegar engar sannanir liggi fyrir um hættulegar gjörðir mannsins. Er þetta rammakvein spekinganna farið að hafa áhrif á börn er óttast framtíð sína vegna ósannra frásagna spekinganna.

Ef sjónvarpið fæst til að sýna þennan þátt frá árunum1998-- 2000 ætti það að vera skylduverkefni í skólum að börn horfi á þennan þátt ef það minnkaði ótta þeirra fyrir þeirri hamfarahlýnun sem spekingarnir hafa blásið upp.

Þessi orð eiga ekki að minnka varnaðarorð er varðar bætta umgengni mannsins á jörðinni en subbugangur mannsins með dreifingu á rusli er óásættanlegur. Er full ástæða til að hvetja til hreinlegri umgengni mannsins á jörðinni.

Reykjavík 13. apríl 2022

Kristján S Guðmundsson

fv. skipstjóri